बुझ्ने मौका (Opportunity to Understand)
बिहान सबेरै मुनाकी हुनेवाला सासूको फोन आमाको मोबाइलमा आयो।
मुनाले फोन रिसिभ गर्नेबित्तिकै उनको सासूले ठूलो स्वरमा भनिन्, "के भयो? तिम्रो फोन किन अफ छ? तिमीलाई थाहा छ रामहरि कति निराश भइरहेको छ? रामहरि तिमीसँग रिसाएको छ। त्यस्तो के भन्यौ तिमीले, ऊ मसँग पनि रिसाइरहेको छ। उसले बुहारी छान्ने जिम्मा मलाई लगाएको थियो। मैले तिमीलाई मन पराएकी थिएँ। मैले इन्गेजमेन्ट र विवाहमा धेरै ग्याप राखिदिएँ ताकि तिमीहरू एकआपसमा राम्रोसँग कुराकानी गर्न सक, एक-अर्कामा घुलमिल हुन सक भनेर। तर, तिमी केटाकेटीहरूले मेरो कुरा बुझ्नै सकेनौ। अब विवाह हुन एक महिना बाँकी छ। रामहरि मलाई भन्दै छ, कस्तो गँवार केटीसँग मेरो बिहे फिक्स गरिदिनुभयो तपाईंले?"
"तिमी त पढेलेखेकी छौ, मुना। केही बोल्नुभन्दा पहिला सोच्नुपर्ने थियो तिमीले। ठिक छ, रामहरिलाई फोन गर र एकपटक सरी भन्देऊ, कुरा सकिन्छ," सासूले भनिन्।
"म सरी भन्दिनँ," मुनाले हिम्मत जुटाएर भनी।
"किन? अरे छोरी, विवाहजस्तो पवित्र बन्धन बाँध्न गइरहेकी छौ। तिमीले बुद्धि-विवेकले काम लिनुपर्छ," सासूले सम्झाउँदै भनिन्।
"जब मैले कुनै गल्ती गरेकै छैन भने सरी किन भनुँ?" मुनाले बिस्तारै जवाफ दिई।
"फेरि रामहरि किन यस्तो भनिरहेको छ? हेर छोरी, यति धेरै घमण्ड गर्नु राम्रो होइन। तिमी एकपटक कुरा त गर," सासूले थोरै ठूलो आवाजमा भनिन्।
"आन्टी हजुर, तपाईंलाई थाहा पनि छ के। रामहरिले मसँग मेरो नग्न फोटो माग्दै छ। अनौठा-अनौठा कुरा गर्न भन्छ। मैले उसलाई सम्झाएँ, यो गलत हो भनेर। तर, ऊ जिद्दी गर्दै छ, फोटोहरूका लागि। त्यसैले मैले मेरो मोबाइल फोन अफ गरेकी हुँ, यो सोचेर कि सायद ऊ यस्तो अजीब हर्कत गर्न बन्द गर्नेछ र यस्ता कुराहरू बिर्सियोस् भनेर। थाहा छैन, आन्टी रामहरिले तपाईंलाई के भन्यो तर साँचो यही हो," मुनाले भनी।
मुना यति बोलेर आफ्नी आमालाई अँगालो हालेर रुन थाली। उता फोनमा उसकी हुनेवाला सासू हेल्लो... हेल्लो... भन्दै थिइन्।
मुनाकी आमाले फोन उठाएर भनिन्, "हजुर दिदी, भन्नुहोस्।"
"बहिनी, तपाईं सम्झाउनुहोस् मुनालाई। रामहरि अलिक 'मोर्डन युग'को केटा हो, त्यसैले यस्तो भन्यो होला," मुनाकी हुनेवाला सासूले भनिन्।
"राम्रो भयो तपाईंले इन्गेजमेन्ट र बिहेको ग्याप राखेर। यी दुईलाई एक-अर्कालाई राम्रोसँग बुझ्ने मौका दिनुभएकोमा। हामीले राम्रोसँग चिन्यौँ तपाईंको छोरालाई, र आशा छ तपाईंले पनि मेरी छोरीलाई राम्रोसँग चिन्नुभयो होला। जहाँ हाम्रो संस्कृति, सभ्यता र महिलाहरूको सम्मान हुँदैन, त्यहाँ हामी कुनै सम्बन्ध राख्दैनौँ। नमस्कार..." भन्दै मुनाकी आमाले फोन राखिन् र रुँदै मुनालाई अँगालो हालिन्।
){kind=link}
Post a Comment